គណបក្សប្រជាជនកម្ពុជាសង្កាត់ស្ទឹងត្រែង បើកយុទ្ធនាការឃោសនាបោះឆ្នោត

គណបក្សប្រជាជនកម្ពុជា សង្កាត់ស្ទឹងត្រែង ក្រុងស្ទឹងត្រែង ដែលមានសមាជិកចូលរួមប្រមាណជាមួយពាន់នាក់ ដឹកនាំដោយឯកឧត្តម ឡូយ សុផាត ប្រធានក្រុមការងារថ្នាក់កណ្តាលចុះជួយខេត្តស្ទឹងត្រែង ដង្ហែក្បូនឃោសនារកសំឡេងឆ្នោត នៅសង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង នាព្រឹកថ្ងៃទី២០ ខែ ឧសភា ឆ្នាំ២០១៧។

ក្បូនដែលជួបជុំគ្នានៅម្តុំសួនច្បាមុខសាលាខេត្តស្ទឹងត្រែង ដោយមានទាំងក្បួនរថយន្តនិងម៉ូតូ ដែលមានសមាជិក សមាជិកា និងអ្នកគាំទ្រគណបក្សប្រជាជនកម្ពុជា មកពីសង្កាត់ស្ទឹងត្រែងផ្ទាល់ ដោយក្បួនដង្ហែបានចាប់ផ្តើមចេញពីសួនច្បាមុខសាលាខេត្តស្ទឹងត្រែងតាមផ្លូវលេខ ៦៨ឆ្ពោះទៅកាន់ភូមិរាជានុកូលតាមផ្លូវលេខ ៦៤ បត់ទៅភូមិព្រែកតាមផ្លូវលេខ៣៦ ហើយបត់ចូលផ្លូវលេខ៦៧ ហើយបន្តដំណើទៅកាន់ផ្សារស្ទឹងត្រែងតាមផ្លូវលេខ ១៤ ហួសទៅភូមិកណ្តាលតាមផ្លូវលេខ៦១ រួចឆ្ពោះទៅផ្ឡូវលេខ៥៧បកត្រឡប់ក្រោយវិញកាត់ផ្សារស្ទឹងត្រែងរួចបន្តក្បួនដង្ហែរតាមផ្លូលេខ៦៤កាត់រង្វង់មូលថ្មីក្រុងស្ទឹងត្រែង ត្រឡប់មកជួបជុំគ្នានៅ សួនច្បារមុខសាលាខេត្តស្ទឹងត្រែងវិញ។

មុននិងចេញក្បួនឃោនាដើម្បីស្វែងរកសម្លេង ឆ្នោតជូនគណបក្សប្រជាជនកម្ពុជា លោក ជា វ៉ាន់ ប្រធានគណបក្សប្រជាជនកម្ពុជាសង្កាត់ស្ទឹងត្រែង បានឡើងធ្វើរបាយការណ៍ស្តីពីសមិទ្ធផលធំៗការងារគណបក្សប្រជាជនកម្ពុជាក្រោមការដឹកនាំដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស សម្រេចបានក្នុងការអភិវឌ្ឍន៍ជាតិឲ្យមានរីកចំរើនឥតឈប់ឈររហូតមកដល់បច្ចុប្បន្ន។

លោកបានថ្លែងទៅកាន់សមាជិកសមាជិកាបក្សមុនពេលក្បួនចេញដំណើរថា ដំណើរការឃោសនាបោះឆ្នោតបានប្រព្រឹត្តិទៅយ៉ាងមហោឡារឹក មានការទាក់ទាញ និងគាំទ្រពីមហាជន គឺដោយសារយើង (គណបក្សប្រជាជន) គោរពបានត្រឹមត្រូវតាមច្បាប់ បទបញ្ជា និតិវិធី និង ក្រមសីលធម៍ នៃការបោះឆ្នោតប្រកាន់យកការអត់ធ្មត់ និងសូមអំពាវនាវឲ្យសមាជិកសមាជិកាទាំងអស់ ដែលបានចូលរួមហែនៅថ្ងៃនេះ ត្រូវគោរពឲ្យបានវិន័យ សេចក្តីថ្លៃថ្នូរ ប្រកាន់យកការអត់ធ្មត់ និងរក្សាឲ្យបានសណ្តាប់ធ្នាប់ល្អ ដូចដែលធ្លាប់បានធ្វើកន្លងមក។

ឯកឧត្តម ឡូយ សុផាត ប្រធានក្រុមការងារថ្នាក់កណ្តាលចុះជួយខេត្តស្ទឹងត្រែង បានឲ្យដឹងថា៖ ថ្ងៃនជេះជាថ្ងៃទី១នៃយុទ្ធនាការឃោសនាបោះឆ្នោត ដោយយោងតាមច្បាប់របស់គ ជ ប ដែលបានកំណត់ថ្ងៃសម្រាប់យុទ្ធនាការ ឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ដែលត្រូវប្រព្រឹត្តទៅចាប់ពីថ្ងៃទី ២០ ខែ ឧសភា ឆ្នាំ២០១៧ រហូតដល់ថ្ងៃទី០២ ខែ មិថុនា ឆ្នាំ២០១៧ ទើបត្រូវបញ្ជប់ការឃោសនា ។

ឯកឧត្តមបន្តថា៖ គណបក្សប្រជាជនកម្ពុជា គឺជាគណបក្សដែលមានសមត្ថភាពទាំងក្នុងការរំដោះប្រទេសជាតិពីរបបប្រល័យពូជ សាសន៍ប៉ុលពត និងមានសមត្ថភាពដឹកនាំ កសាងអភិវឌ្ឍន៍ប្រទេសអោយរីកចម្រើនមកទល់ពេលបច្ចុប្បន្ន ក្រោមកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានសម្រេចជោគជ័យដ៏ធំធេងលើគ្រប់វិស័យ ។

បោះឆ្នោតជូនគណបក្សប្រជាជនកម្ពុជាបន្តពង្រឹងសន្តិភាពស្ថិរភាព សន្តិសុខ និង សណ្តាប់ធ្នាប់សង្គម ឲ្យបានរឹងមាំ និងជម្រុញការកសាង អភិវឌ្ឍន៍ប្រទេសលើគ្រប់វិស័យ ប្រកបដោយនិរន្តរភាព ដែលជាគ្រឹះដ៏រឹងមាំក្នុងការសម្រេចគោលដៅរបស់គណបក្សប្រជាជនកម្ពុជា ក្នុងរយៈពេល ០៥ឆ្នាំខាងមុខ ក្នុងការអភិវឌ្ឍន៍ បម្រើប្រទេសជាតិ និង ប្រជាជនតទៅមុខទៀត ដោយឈរលើមាគ៌ាសន្តិភាព ឯកភាព ប្រជាធិបតេយ្យ និង អភិវឌ្ឍន៍ ព្រមទាំងសូមឲ្យជនរួមជាតិ នៅគ្រប់មជ្ឈដ្ឋាននៃព្រះរាជាណាចក្រកម្ពុជា គាំទ្រ និង ចូលរួមអនុវត្តយ៉ាងសកម្ម នូវគោលនយោបាយអភិវឌ្ឍន៍ឃុំ សង្កាត់ ឲ្យក្លាយជាមហាចលនារបស់ជាតិយើងទាំងមូលប្រកបដោយជោគជ័យ។

ឯកឧត្តមបានគូសបញ្ជាក់ថា៖ ដើមី្បថែរក្សាការពារសន្តិភាពស្ថិរភាព សន្តិសុខ និង សណ្តាប់ធ្នាប់សង្គម រាល់សមទ្ធិផលនៃសង្គមជាតិឲ្យបានគង់វង្ស និង ដណ្តើមជោគជ័យធំៗ ក្នុងការថែរក្សាសន្តិភាព និង អភិវឌ្ឍមាតុភូមិ និង លើកស្ទួយជីវភាពរបស់ប្រជាជន យើងនាំគ្នាទៅបោះឆ្នោតជូនគណបក្សប្រជាជនកម្ពុជាឲ្យបានគ្រប់ៗគ្នា! បោះឆ្នោតជូន គណបក្សប្រជាជនកម្ពុជា គឺបោះឆ្នោតឲ្យខ្លួនឯង។

គេហទំព័ររបស់គណបក្សតាមបណ្តារាជធានី ខេត្ត